Ivalo & Minik Fonden tamanna nuannaarutigingaakkatsinnik nalunaarutigerusupparput, martsimi siulersuisuni naapinnitsinni legatit marluk 300.000 koruunit sinnerlugit nalillit tunniukkatsigit.
Siulersuisuni siulittaasoq Mini Rosing tamanna tunngavigalugu ima oqaaseqarpoq:
”Ivalo & Minik Fonden nuannaarutigiuaannarparput ilinniartut nunarsuatta ilaannut ilinniariaqqittarnerannut ikiuussinnaagaangatta. Neriuppunga legatit ilinniartunut Kalaallit Nunaannullu iluaqutaaqqissasut.”
Ivalo & Minik Fonden nunatta avataanut ilinniariartartut 2014-miilli Kalaallinut legatit 50-it sinnilaarlugit tunniutereersimalerpai. Ivalo & Minik Fonden ukiumut aningaasaliissutinik NunaFonden, Royal Greenland A/S, Royal Arctic Line A/S aamma GrønlandsBANKEN inuussutissarsiornermut aningaasaateqarfianiit tunineqartarpoq, tamannalu tunngavigalugu legatinik tunniussisarluni.
” NunaFonden, Royal Greenland A/S, Royal Arctic Line A/S aamma GrønlandsBANKEN inuussutissarsiornermut aningaasaateqarfianiit tunniussaqarnermikkut inuiaqatigiinni akisussaqqataanerat qujamasuutigaarput. Aningaasanik tunissuteqartarsimanngikkaluarpata legatinik tunniussisarsimanavianngikkaluaratta,” Minik Rosing nassuiaavoq.
Upernaami legatinik tigusisut
Malik Koch Hansen International University of Japan-mi Inuiaqatigiilerineq ilinniariaqqiffiginerani ingerlariaqqinnissaminut legatinnappoq.
Lana Hansen Larsen Language International Campus I Seoul, Sydkorea-mi Korea-miusut ilinniarnissaminut legatinnappoq.
Qinnuteqartoqarnissaanut ammavoq
Ivalo & Minik Fonden ukiamut legatinik tunniussisarnini ingerlateqqissavaa. Qinnuteqaatit ingerlaavartumik tiguneqartarput. Qinnuteqarnissamut killigitinneqartoq tulliuvoq 1. oktober 2022.