Ivalo & Minik Fonden legatinik agguaasseqqippoq. Legatinik tunineqartut sisamat katillutik 270.000 koruunit sinnilaarlugit pissarsipput. Taakkulu saniatigut Ivalo & Minik Fonden nutaamik siulersuisortaarpoq pingasunik nutaanik ilaasortaqalersumik. Minik Rosing ukiuni tulliuttuni sisamani siulittaasutut ingerlaqqippoq.
NunaFonden, Royal Greenland, Royal Arctic Line aamma GrønlandsBANKENs Erhvervsfond aningaasaliilluarnerisa pissutigaat, Ivalo & Minik Fonden kalaallinut ilinniartunut pikkorissunut sisamanut legatinik agguaasinnaasimanera.
”Nuannaartuaannarpugut maani Kalaallit Nunaanni ilinniarsimassutsimut- piginnaasaqarnermut qaffassaaqataasinnaagaangatta. Neriuppunga, legatinik tunineqartut aamma massakkut ilinniarnerminni ingerlalluarlutillu pissarsilluarumaartut” Ivalo & Minik Fonden siulersuisuini siulittaasoq Minik Rosing oqarpoq.
Legatinik sisamanik agguaassineq siulersuisuusimasut kingullertut suliaraat. Ukiut sisamakkaarlugit siulersuisunik nutaanik toqqaasoqartarpoq. Taassumalu kinguneraa, ukiuni tulliuttuni sisamani siulersuisut ukuussasut:
Siulittaasoq Minik Rosing (Ilisimatusarfimmit toqqarneqartoq)
Siulittaasup tullia Janus Kleist (Ilinniartitaanermut qullersaqarfimmit toqqarneqartoq)
Paarnannguaq Mathiassen (NunaFonden-imit toqqarneqartoq)
Jens Napãtôk’ (NunaFonden-imit toqqarneqartoq)
Christian Schønau (Det kongelige Danske Hof-imit toqqarneqartoq)
Siulittaasup siulersuisuni ilaasortaasimasut annertuumik qujassuteqarfigai ukuusut Dorthe Bidstrup, Juliane Henningsen aamma Johan Lund Olsen siulersuisuusimasuni ataqqinartumik suleqataasimanerannut.
Ivalo & Minik Fondensiulersuisui legatinik agguaassallutik ukiumut marloriarlutik naapittarput, siulersuisullu nutaat neriupput tulliani agguasseqqinnissamut, 1. oktober 2024 qinnuteqarfigineqartussatut killilimmut, tunngavilersorluakkanik amerlasuunik qinnuteqaatinik tigusiumaarlutik.
Upernaanerani legatinik pissarsisut
Edna Lyberth semesterimi ataatsimi University of California Santa Cruz, USA-mi ilinniarnissaminut legatimik tunineqarpoq, DTU-mi fiskeriteknologi-mi ilinniakkaminut atasumik.
Varna Marianne Nielsen Arts-imi Masterinngorniarluni Reykjavik, Island-imi ilinniakkami nanginnissaanut legatinik tunineqarpoq.
Sanne Broberg ”Inddigenous sustainable cultural development within therapeutic treatmens for Greenlandic Inuit” PhD-nngorniarluni ilinniakkaminut atasumik SHOEW & Whariki Research Centre, College of Massey University Auckland New Zealandimi ilisimatusarnissaminut legatimik tunineqarpoq.
Casper Eliassen Universitetimi, HAL Tokyo, Japanimi IT-ilinniarnerminut legatimik tunineqarpoq.