Ivalo & Minik Fonden aningaasaliisunut nutaamik isumaqatigiissusiorput

Ivalo & Minik Fonden kalaallinut ilinniartunut nunani allani pikkorissarnissaminnut kissaateqartunut, aningaasaliisarnerminik nangitsivoq. Tamanna peqquteqarpoq, NunaFonden, Royal Greenland A/S, Royal Arctic Line A/S aamma GrønlandsBANKEN aningaasatigut tapiissuteqarnertik nangissallugu aaliangersimammata.

Ivalo & Minik Fonden-imi siulersuisuni siulittaasoq Minik Rosing tassunga atatillugu ima oqaaseqarpoq:

”Aningaassaliisutsinnit tapersersorneqarnerput nuannaarutigisorujussuuara. Aningaasaleeqqinnerat isumaqarpoq, ilinniartunut angusaqarluarniartunut,  inuiaqatigiinnut tamarmut Nunatsinnut angerlaassassaminnik nunanut allanut piginnaasaminnik qaffassaajartorlutik anglasunut, aningaasaliisarnerput nangeqqissinnaagipput”.

Ivalo & Minik Fonden 2014-imili 40-nut aningaasaliisimavoq, aningaasaliisunillu aamma suleqatigiinneq nuannaarutigineqarpoq.

Jens K. Lyberth, Royal Greenland A/S-mi Kommunikation aamma HR-mi Direktøri oqaaseqarpoq: “Tulluusimaarutigaarput, inuusuttut amerlanerit nunat assigiinngitsut akornanni ilinniagaqarnerannut peqataanermut. Tamanna inuiaqatigiitsinnut pingaartuuvoq”.

Royal Arctic Line-imi Sponsorudvalgimut siulittaasoq, Ann-Britta A. Olsvig oqaaseqarpoq:
”Royal Arctic Line-ip nuannaarutigaa inuusuttut, nunani allani ilinniagaqarnerminnut anguniagaannut tapersiisinnaagami. Ataatsimoorluta siunissami Kalaallit-Nunaanni sulisussatta ilinniagaasa qaffassarnissaat qulakkeerniassavarput.”

Kristian Lennert, GrønlandsBANKEN Inuussutissarsiornermut aningaasaateqarfiani siulittaasoq oqaaseqarpoq:
“ Ukiuni 30-vit sinnerlugit ingerlasimasumi Kalaallit-Nunaanni ilinniartitaanermut tapersersuisimavugut. Nuannaarutigaarput, tapersiinitsigut Ivalo & Minik Fonden tapersiisinnaammata, ilinniagaqartut pikkorissut nunani allani ilinniarnerminnik ilisimasanik nutaanik pissarsisinnaammata.”

Anders Olsen, NunaFonden siulersuisuini siulittaasoq oqaaseqarpoq:
”2012-imi Ivalo & Minik Fonden NunaFonden-imit pilersinneqarpoq siunertaralugu, kalaallit amerlanerusut ilinniaqqiffinni ilinniagaqartut nunarsuarmut pikkorissariarlutik angalanissaannut. Maannamut iluatsilluarsimavoq, NunaFonden-illu qilanaaraa, taanna iluatsilluarsimasoq Kalaallit Nunaanni inuiaqatigiinnut nuannaarutaasumik ingerlaannassasoq.”

Tulliani aningaasanik agguaassineq pissaaq upernaaru 2021-imi, sulilu qinnuteqartoqarsinnaavoq, qinnuteqarnissamut killigititaq unaammat 15. februar.