Aningaasaateqarfiup Ivalo & Minik Fondenip siulersuisui marsip 20-ani ataatsimiinnerminni aalajangerput legatinik arfinilinnik agguaassiniarlutik. Agguaanneqartut katillugit 399.000 koruuninik aningaasartaqarput.
“Aningaasat agguaassagut NunaFondenimit, Royal Greenlandimit, Royal Arctic Linemit GrønlandsBANKENillu Inuussutissarsiornermut aningaasaateqarfianit tunissutaapput, taamaammat inuusuttunik angusaqarluarniartunik tapersersuisinnaanitsinnut taakku pisooqataalluinnarput. Tamatumunngalu qujassuteqarfigerusuppakka,” Minik Rosing, Ivalo & Minik Fondenimi siulersuisunut siulittaasoq taama oqarpoq, imalu nangippoq:
“Legatinnattut pissarsiffiulluartumik nunani allaniinnissaat, kingornalu Nunatsinnut uterumaarnissaat aammalu ilisimasanik pissarsiarisaminnik atuilluarnissaat neriuutigaara.”
Legatinnattut
Alex Amâsa Olsen, Danmarks Tekniske Universitetimi ingeniørinngorniarnerminut atatillugu, Australiami ilisimatusarfimmi University of Queenslandimi Brisbanemiittumi semesterimi ataatsimi ilinniarnissaminut legatimik tunineqarpoq.
Ane Eva Lange, Danmarks Tekniske Universitetimi ingeniørinngorniarnerminut atatillugu, Norgemi teknikkikkut pinngortitarlu pillugu ilisimatuussutsikkut ilisimatusarfimmi Trondheimimiittumi semesterimi ataatsimi ilinniarnissaminut legatimik tunineqarpoq.
Anne Eileen Lennert Norgemi Issittumi pissutsit pillugit Ilisimatusarfimmi PhD-nngorniarluni ilinniarnerminut legatimik tunineqarpoq. Silap pissusiata allanngoriartornerata Kalaallit Nunaanni pinngortitamut piffissaq ungasinnerusoq eqqarsaatigalugu sunniutissai tassani misissuiffigissavai.
Inuuteq Storch New Yorkimi ICP-mi – International Center of Photographymi – assiliisartutut ilinniagaqarnissaminut legatimik tunineqarpoq.
Nick Bæk Heilmann Kinami Bejingimi Renmin Universitymi Kina nutaaliaasoq pillugu ilisimatusarluni kandidatinngorniarnissaminut legatimik tunineqarpoq.
Trine Jul Larsen Norgemi Issittumi pissutsit pillugit Ilisimatusarfimmi Tromsømiittumi Master of Public Healthinngorniarnissaminut legatimik tunineqarpoq.
Ivalo & Minik Fondenip legatinik agguaassisarnini soorunami ingerlatiinnassavaa. Tulliani qinnuteqarnissamut killigititaq tassaavoq oktobarip aallaqqaataa 2015, siulersuisullu qinnuteqaatinik pitsaasunik amerlasuunik pissarsinissartik qilanaarivaat.