Aningaasaateqafiup Ivalo & Minik siulersuisui kingullermik ataatsimiikkami kalaallinut arfineq-marlunnut nunani allani ilinniartunut legatinik agguaapput. Legatit agguaanneqartut milliuunip affaa sinnilaarlugit aningaasartaqarput. Tamanna aningaasaateqarfiup siulersuisuini siulittaasup Minik Rosingip nuannaarutigaa.
“Neriuppunga legatiutigut aqqutaajumaartut ilinniartut piginnaaneqanerulernissaannut aamma misilittagaqarnerulernissaanut taakkununnga Kalaallit Nunaannullu iluaqutaasumik. Neriuppunga legatinik pissarsisut tamarmik nunani allaniinnertik iluaqutissarsivigiumaaraat kingornalu Kalaallit Nunaannut uteriarunik ilisimalikkatit Kalaallit Nunaanni atorumaaraat” oqarpoq Minik oqarpoq.
Royal Arctic Line A/S-p, Royal Greenland A/S-p, GrønlandsBANKEN’s Erhvervsfond-p aamma NunaFondenip aningaasaleeqataassutaat Aningaasaateqarfiup Ivalo & Miniup agguaattarpai, tamannalu Minik Rosingip qujamasuutigaa.
“Atagu oqaatigiinnariarlara. Aningaasaliiffigineqanngikkutta tunniussassaqanngilagut. Taamaattumik aningaasaliisartugut qutsavigerusuppakka nunani allani ilinniartunut tapersersuinissaarput periarfissimmassuk,” naggasiivoq Minik Rosing.
Legatinik pissarsisut
Andrea Christiansen legatinnappoq, Ilisimatusarfimmi tusagassiortunngorniarnerminut atatillugu semesteri ataaseq Canadami Vancouver Island Universitymi ingerlanniassammagu.
Angùnguak Thomas Kleist Jepsen legatinnappoq Københavnip universitetiani ujarassiuumut ilinniarnerminut atatillugu Australiami Curtin Universitymi semestret pingasut ingerlanniassammagit.
Birthe Rasmussen Ilisimatusarfimmi peqqissaasumut ilinniarpoq. Legatimik pissarsivoq Mellemfolkeligt Samvirke aqqutigalugu Tanzaniami peqqissaasutut ilinniarnerminut atatillugu sungiusaatigalugu suliniassammat.
Hans Peder Kirkegaard legatinnappoq Nunarsuarmioqatigiit niueqatigiinnerat pillugu Masterimut USA-mi University of South Carolinami Darla Moore School of Businessimi atuarniassammat.
Mikaela Augustussen peqqissaasutut naammassinikuuvoq aallartinnikuullugulu Ph.D-mut ilinniarnini Ilisimatuarfimmi qulequtaqartoq “Kalaallit Nunaanni Danmarkimilu kalaallinut nappaassuarmik kræftimik napparsimangaatsialereersunut nipaallisaalluni katsorsaaneq”. Tassunga atatillugu Tromsømi Norgep Arktiske Universitetiani atuarnissaminut legatimik pissarsivoq.
Mona Koch Madsen Ilisimatusarfimmi peqqissaasumut ilinniarnikuuvoq. Sverige Stockholmimi Karolinska Institutimi intensivsygeplejerskimut ilinniaqqinnissaminut legatimik pissarsivoq.
Uiloq Mathæussen Ilisimartusarfimmi Oqaatsinut, Atuakkialerinermut aamma tusagassiutinut bacheloriuvoq. Ilinniaqqinnerminut atatillugu Frankrigimi Université De Versailles St. Quentin En Yvelinesimi semesteri ataaseq atuassavaa tassunga atatillugu legatimik pissarsivoq.
Aningaasaaqarfik Ivalo & Minik soorunami legatinik tunniussuinini nangeqqissavaa. Tullianut qinnuteqarnissamut killiuvoq ulloq 15. februar 2016, tassunga atatillugu siulersuisut qinnuteqaaterpassuarnik tigusaqarnissaminnut qilanaarput.