Ivalo & Minik Fonden kingullermik siulersuisuisa ataatsimiinnerminni aningaasat tunniussassat pingasut katillugit 200.000 koruunit ataatilaarlugit pingasunut agguaanneqassasut aalajangerput. Aningaasanik tunineqartussaat taakku pingasut Schweiz, Belgien aamma USA-mi ilisimasaminnik piginnaasaminnillu qaffassarnissaminnut atugassaraat.
Ivalo & Minik Fonden-ip siulersuisuini siulittaasup, Minik Rosing-ip nuannaarutigaa, aningaasaateqarfik aammaarluni periarfissaqarsimammat kalaallinut inuusuttunut nunani allani ilinniarnissaminnut sinnattuannut tapersiisinnaanertik:
”Aningaasanik agguaanerit tamaasa, inuusuttunik annertuumik maligassiuerusuttunut ilinniarusussuseqartunullu tapersersuisarpugut. Aallartarput ilinniagaqarusussuseqarlutik annertuumillu tunniusimallutik angerlamullu utertarlutik nutaanik ilisimasaqalersimallutik, nutaanik isiginnittaaseqalersimallutik aammalu sakkortuumik piumassuseqalersimallutik inuiaqatigiinnut tapertaanissamut. Malinnaaffigalugillu attortinnarlutillu iguartinnarlutik,” oqarpoq.
Tunisiumatooqarmat tamanna perirfissinneqarpoq
Aningaasaateqarfiup ilinniariarluni angalanernut taakkununnga tapersiisinnaaneranut pissutaavoq Royal Greenland, Royal Arctic Line, NunaFonden aamma GrønlandsBANKENs Erhvervsfond aningaasaliilluarsimanerat. Taakku tapersiinerat aningaasaateqarfiup sulineranut apeqqutaalluinnartarput.
”Qujamassuttorujussuuvugut suleqatigiinnermik tatiginninnermillu, aningaasaliisaartutta ukiut tamaasa takutitsiuartarmata. Tapersersuinerat inummut ataatsimut aningaasanik tunniussinertut taaneqaannarani – nunatsinnut tamarmut aningaasaliinertut isigineqartariaqarpoq,” Minik Rosing oqarpoq.
Ivalo & Minik Fonden ukiumut marloriarluni aningaasanik agguaassisarpoq. Qinnuteqaatinut killigititaq tulleq tassaavoq 1. oktober 2025, aningaasaateqarfiullu kalaallit ilinniarusussusillit nunani allani ilinniarnissaminnik pilersaarutillit tamaasa kajumissaarpai qinnuteqaammik nassiusseqqullugit.
Upernaanerani aningaasanit pissarsisut
Hans Peder Kirkegaard aingaasanik pissarsivoq PhD-liornissaminut Ilisimatusarfimmi Illersornissamut- isumannaallisaanermullu Issittumi politikki ilinniakkaminut atasumik Belfer Center Arctic Initiative at the Harvard Kennedy School USA-mi ilinniarnissaminut.
Kivioq Kreutzmann Geneve Schweiz-imi Universitetimi semesteri ataaseq atuarnissaminut aningaasanik tunineqarpoq Film og Medievidenskab Københavns Universitetimi ilinniarnerminut atasumik ilinniariartornissaminut.
Rosalia Stenbakken Gent-imi Belgiami semesteri ataaseq Århus Universitetimi politologi-mi Masterinngorniarnerminut atasumik atuarnissaminut aningaasaliiffigineqarpoq.