Aningaasaateqarfiup Ivalo & Minik Fondenip siulersuisui septembarip 12-iani ataatsimiinnerminni legatinik sisamanik agguaapput katillugit 100.000 koruunit sinnerlugit aningaasartalinnik, 2014-imi aningaasat agguaanneqartut taamaasillutik katillugit 450.000 koruunit missaanniilerput.
“Aningaasat agguaassagut NunaFondenimit, Royal Greenlandimit, Royal Arctic Linemit aamma GrønlandsBANKENip Inuussutissarsiornermut aningaasaateqarfianit tunissutaapput, taamaammat inuusuttunik angusaqarluarniartunik tapersersuisinnaanitsinnut taakku pisooqataalluinnarput. Tamatumunngalu qujassuteqarfigerusuppakka,” Minik Rosing, Ivalo & Minik Fondenimi siulersuisut siulittaasoq taama oqarpoq. Nangipporlu:
“Legatinnattut pissarsiffiulluartumik nunani allaniinnissaat, kingornalu Nunatsinnut uterumaarnissaat aammalu ilisimasanik pissarsiarisaminnik atuilluarnissaat neriuutigaa.”
Legatinik pissarsisut
Aviaaja Birkholm Professionshøjskolen Metropolimi ernisussiortutut ilinniarnerminut atatillugu Balimi ernisarfimmi sungiusaatigalugu sulinissaminut legatimik tunineqarpoq.
Kathrine Naaja Rasmussen Københavns Universitetimi nakorsanngorniarnerminut atatillugu Bergenimi (Norge) Universitetshospitalimi sungiusaatigalugu sulinissaminut legatimik tunineqarpoq.
Qivioq Kern Kreutzmann Danmarkimi suliffeqarfinnik aallartisaasut pillugit aaqqissuussinermut “Iværksættere i udlandet” peqataasussatut toqqagaanerminut atatillugu San Franciscomi sungiusaatigalugu sulinissaminut legatimik tunineqarpoq.
Anna Sørensen Københavns Universitetimi Institut for Medier, Erkendelse og Formidlingimi ilinniarnerminut atatillugu nunat tamalaat suliniaqatigiiffianni assigisaaniluunniit inaarutaasumik sungiusaatigalugu sulinissaminut legatimik tunineqarpoq.
Ivalo & Minik Fondenip legatinik agguaassisarnini soorunami ingerlatiinnassavaa. Tulliani qinnuteqarnissamut killigititaq tassaavoq marsip aallaqqaataa 2015, siulersuisullu qinnuteqaatinik pitsaasunik amerlasuunik pissarsinissartik qilanaarivaat.