Aningaasaateqarfik Ivalo & Minik Fonden kalaallit nunanut allanut aallarlutik ilinniarnissaannut ikiornissaannik siunertaqarpoq. Ivalo & Minik Fondenimi siulersuisut legatinik ataasiakkaanut iluaqutaalluartussanik tunniussinissaq pingaartitaraa. Allatut oqaatigalugu, legatit ataasiakkaat kalaallit ilinniarnissamik sinnattui ilumut piviusunngorsinnaanerannut aalajangiisussat.
Pingaarnersiuinermilu tamanna siunertaralugu siulersuisut legatinik agguaassinermi matumani legatimik ataatsimik 300.000 koruunit sinnerlugit nalilimmik qinnuteqartumut ataatsimut tunniussiniarlutik aalajangerput. Siulersuisuni siulittaasoq Minik Rosing ima itisiliivoq:
“Sinnattut piviusunngortinnissaat peqataaffigerusuppagut, matumanilu taamaaliorluta qularutiginngilluinnarparput. Ilinniarnissarmi matumani pineqartoq aningaasaateqarfinnit assigisaannillu annertuumik tapersersorneqarnikkut aatsaat iluatsissinnaavoq,” oqarpoq nangillunilu:
“Legatit taama ittut tunniukkusoqaagut, aamma legatimik tunineqartup piginnaasat angerlaakkumaagai inuiaqatigiinnut kalaallinut naleqartupilussuussasut qularutiginngilluinnarpara.”
Legatimik tunineqartup Uiloq Mathæussenip legati Sydneymi Macquarie Universitymi Nunani tamalaani Attaveqaqatigiinneq pillugu Masterinngorniarnermut ilinniarnermut akiliutissanut Australiamilu najugaqarnermini aningaassartuutissaminut atorusuppaa. Ilinniagaq qaammatinik 18-inik sivisussuseqarpoq. Tassungalu atatillugu ima oqarpoq:
“Una ilinniarusunneranut siunertaavoq nunarsuarmut siaruarnerup, tusagassiuutit inuillu atassuteqaqatigiinnerisa itinerusumik paasisaqarfigissallugit. Ilisimasat Nunatsinni inuiaqatigiit silarsuarmi avatitsinnit pisunit sunnerneqariartuinnarnerat ilutigalugu pigissallugit pingaaruteqartut,” taama oqarpoq nangillunilu:
“Ivalo & Minik Fondenimit legatimik tunineqarnikkut taama periarfissaqalernera nuannaarutigeqaara, aamma ilinniakkap pitsaanerpaamik naammassinissaa ilungersuutigissavara. Tamatumunnga peqatigitillugu oqaatigissavara Nunatsinnut uteruma pisinnaasat piginnaasallu Australiami pigilikkama atornissaat pingaartittupilussuugakku.”
Legati Royal Arctic Line A/S-imit, Royal Greenland A/S-imit, GrønlandsBANKEN-ip Inuussutissarsiornermut aningaasaateqarfianit NunaFondenimiillu tunissutaasut tunngavigalugit aningaasalersorneqarpoq.
Ivalo & Minik Fondenip legatinik agguaassisarnini soorunami ingerlatiinnassavaa. Qinnuteqarnissamut killiliussaq tulleq tassaavoq februaarip 15-iani 2017, siulersuisullu qinnuteqaaterpassuarnik pitsaasunik nassinneqarnissartik qilanaarivaat.
Inuss. Inuull.
Ivalo & Minik Fonden
www.imf.gl