Ivalo & Minik Fonde-nip siulersuisui ukioq affakkaarlugu novembarimi ataatsimiinnerminni aaliagersimavaat legatinik pingasunik inuusuttunut kalaallinut soorlu New Zealand-imi, Sydkoreami Norgemilu ilinniartunut ikiuisussanik agguaassiniarlutik. Legatit 100 procentimik Royal Arctic Line A/S, Royal Greenland A/S, GrønlandsBANKEN’s Erhvervsfond, NunaFonden-imiillu tunissutinit aningaasalersorneqarput.
Siulersuisuni siulittaasoq Minik Rosing tamatumuuna imatut oqaaseqarpoq:
”Aningaasaliisimasut qutsavigerusuppakka tunniussimermikkut inuiaqatigiinnut iluaqutaasumik akisussaaffimmik tigusimmata. Tunniussat taakku Ivalo & Minik Fonden-ip legatinik agguaassisinnaaneranut tunngaviulluinnarput, illuatugaatigut inuusuttut sinnattuinik ilumoortunngortitsisuummata, aappaatigullu Kalaallit Nunaata innuttaanik ilinniarluarsimanerulernissaannik qulakkeerinnittuulluni. Uanga isumaqarpunga ataatsimut isigalugu inuiaqatigiinni tassaalluinnartoq win-win (tamatta iluanaaruteqarfigisarput).”
Tamatumuunalu Minik Rosing Kalaallit Nunaanni inuussutissarsiortunut kajumissaarivoq.
”Neriuppunga suliffeqarfiit suli amerlanerit, fondit imaluunniit peqatigiiffiit Ivalo & Minik Fonden-imut aamma tapersiisartunngorusussasut. Tunniussisummi amerlaneruppata ilinniartut kalaallit suli amerlanerit tapersersorsinnaanngussangaluarpagut, sulimi pikkortittorsuarnik ilinniartoqarpoq nunani allani ilinniarnermik pissarsiaqarluarsinnaasunik, taassumallu saniatigut Kalaallit Nunaata avammut attaveqaatinik pinngortitsiniarnerani sakkuulluarsinnaalluni.”
2014-imili ilinniartut 40-t sinnilaarlugit Ivalo & Minik Fonden-imit legatinik tunineqarsimapput.
Ukiaanerani legatinnattut
Michael Platou Pusan National University-mi Sydkorea-mi koreami pissutsinik ilinniakkaminik ingerlatitseqqinnissaminut legatinnappoq.
Aviaja Lynge Petersen pædagog-inngorniarnerminut atatillugu New Zealand-imi paaqqinnittarfimmi Spectrum Care-mi praktikkernissaminut legatimik tunitissimavoq.
Ninni Jeremiassen Århus Universitet-iani geologi-tut (ujarassiuutut) ilinniarnerminut atatillugu Norgemi teknikkikkut-pinngortitamillu ilisimatusarnermi Masterinngorniarnerminut atatillugu semesterimik ataatsimik ilinniarnissaminut legat-innassimavoq.
Ivalo & Minik Fondeni soorunami legatinik agguaassisarnini ingerlatiinnassuaa. Qinnuteqarnissamut killigititaasoq tassaavoq 15. februar 2020, tassuunakkullu siulersuisut qinnuteqaaterpassuarnik tigusaqarnissaminnut qilanaarput.