Kalaallit angusaqarluarusussusillit arfinillit nunani allani ilinniarnissaminnut Ivalo & Minik Fonden-imit legaarinnapput. Agguaassineq katillugu 350.000 koruunit sinnilaarlugit annertussuseqarpoq.
Ivalo & Minik Fonden kingullermik agguaassigami kalaallinut, naalagaaffeqatigiinnerup avataani ilinniassallutik toqqaasimasunut legatinik 60-inik agguaassipput.
”Legatimik tunniussinerit tamaasa nuannaartarpugut. Misigisarparput, legatit tunniussagut, ilinniartut pilerigilluinnakkaminnik ilinniarnerminni pikkorissarnissaannut iluaqutaalluartartut. Pilersinneqarattali legatinik 60-ngajannik tunniussisimanerput tulluusimaarutigeqaara,” Minik Rosing oqarpoq, Ivalo & Minik Fonden-imi siulersuisuni siulittaasoq. Nangipporlu:
”Tassunga atatillugu Royal Greenland-imut, Royal Arctic Line-imut, NunaFonden-imut GrønlandsBANKEN-illu inuussutissarsiornermut aningaasaateqarfianit annertuumik qujarusuppunga, ukiut tamaasa aningaasatigut tapiisartunut, taamaasilluta legatinik agguaassisinnaalersilluta.”
Ivalo & Minik Fonden-ip siulersuisui legatinik agguaassissallutik ukiumut marloriarlutik naapittarput, Minik Rosing-ilu neriuppoq tulliani agguaassinissamut, qinnuteqarnissamut killeqartumut 15. februar 2023, amerlasuunik pitsaasunillu qinnuteqaatinik tigusinissaminnut.
Ukiaanerani legatinik tunineqartut
Linda Lyberth Kristiansen Ilisimatusarfimmi kulturimut aamma inuiaqatigiilerinermilu kandidatinngorniarnerminut ilaatillugu semesterimi ataatsimi Norgemi Arktisk Universitetimi Tromsø-miittumi atuarnissaminut legatimik tunineqarpoq.
Maria Lyberth Campus Kujallermi Adventure Guide-itut ilinniarnermini ingerlaqqissutitut ukiuni marlunni Finland-imi Kronoby folkhögskola-mi ilinniaqqinnissaminut legatimik tunineqarpoq
Ninni Jeremiassen ”environmental pollution and toxicology” Norgemi UNIS-imi (The University Centre ind Svalbard) atuagarsornissaminut, PhD-iliornermi ilaanut qulequtaqartumut: ”Long-term leaching dynamics of lead, zind and fluorine from waste rock at Ivittuut mine, South Greenland” legatimik tunineqartoq.
Pipaluk Kristensen Ilisimatusarfimmi Oqaasilerineq, Atuakkialerineq, Tusagassiuutilerinerlu pillugit Kandidatinngorniarluni ilinniarnermi ilaatut, Islands Universitet-imi semesterimi ataatsimi atuarnissaminut legatimik tunineqarpoq.
Victor Langholz USA-mi Oklahoma University-timi Business Administration ilinniarnermi ilaatut, Australiami Wollongong Universitet-imi semesterimi ataatsimi ilinniarnissaminut legatimik tunineqarpoq.
Vivi Vold USA-mi Davis-imi University of California-mi semesterit marluk ilinniarnissaminut, PhD-liornermi ilaanut atassuteqaatit sunniivigeqatigiinnerullu, ilisimatuussutsikkut misissuinermi ilisimatusarnermilu immikkuullarissumik qanoq pisoqartarnersoq Kalaallit Nunaanni ilinniagaqarnermi inuit ilisimatusarnerullu akornanni – ilinniartut ilisimatuullu akornanni.