Ivalo & Minik Fondenip ukiuni tullerni pingasuni aningaasaqarneq qulakkeerpaa

Royal Arctic Line A/S, Royal Greenland A/S, GrønlandsBANKEN-ip Inuussutissarsiornermut aningaasaateqarfia aamma NunaFonden, Ivalo & Minik Fondenip tapersersornera ingerlatiinnarniarlugu tamarmik aalajangerput. Isumaqatigiissutit nutaat ukiunut 2018-2020-mut atuupput, Ivalo & Minik Fondenilu taamaalilluni kalaallinut Kalaallit Nunaata Danmarkillu avataanni ilinniaqqinnissamik kissaateqartunut legatinik agguaassisarnini ingerlatiinnarsinnaavaa.

 

Ivalo & Minik Fondenip kalaallinut takorluukkatik piviusunngortikkumallugit nunani allani ilinniarsimasunut legatit 25-nit amerlanerusut 2014-imiilli tunniuppai. Tamannalu Royal Arctic Line A/S-ip, Royal Greenland A/S-ip, GrønlandsBANKEN-ip Inuussutissarsiornermut aningaasaateqarfiata NunaFondenillu ukiumoortumik aningaasatigut tapiissuteqartarnerisigut aatsaat pisinnaasimavoq.

“Legatinik tunineqartut amerlanersaat piginnaasanik imminnut inuiaqatigiinnullu iluaqutaasunik

pigisaqalersimallutik Kalaallit Nunaannut utertut takusarpagut. Tamannalu tulluusimaarutigaarput. Akeqanngitsuunngilarli. Nunanimi allani ilinniagaqarneq akisuupilussuusarpoq. Taamaammat NunaFondenip, GrønlandsBANKEN-ip Inuussutissarsiornermut aningaasaateqarfiata, Royal Greenland A/S-ip Royal Arctic Line A/S-illu inuiaqatigiinni kalaallini piginnaasanik annertusaanermut ukiumoortumik aningaasatigut tapiissuteqartarnerat aningaasaateqarfiup Ivalo & Minik Fondenip qujamasuutigisupilussuuaa. Aamma ukiuni 2018-imit 2020-imut tapiissuteqartarnermik ingerlatiinnarnissaanik tamarmik aalajangersimanerat nuannaarutigeqaarput,” siulersuisuni siulittaasoq Minik Rosing taama oqarpoq.

Legatinnattut Italiamut, Vietnamimut Japanimullu ilinniariassapput

Ivalo & Minik Fondenip siulersuisui novembarip qaammataani ataatsimiinnerminni ukiaq manna legatit agguaappaat, legatinnattunut pikkorissunut ukununnga tunniunneqartut:

Tukumminnguaq Jakobsen Italiami Milanomi Istituto Marangonimi atisanik ilusilersuisartutut ilinniaqqinnissaminut legatimik tunineqarpoq.

Ivaana Olsen Aalborgip Universitetiani tuluit oqaasiinik nunanullu allanut tunngasunik ilinniarnerminut atatillugu Japanimi Akita International Universitymi semesterimi ataatsimi ilinniarnissaminut legatimik tunineqarpoq.

Maalia Lynge Christiansen Aalborgip Universitetiani oqaatsinik nunanullu allanut tunngasunik ilinniarnerminut atatillugu Vietnamimi Workbook Softwaremi sungiusaatigalugu sulinissaminut legatimik tunineqarpoq.
Royal Arctic Line A/S-ip, Royal Greenland A/S-ip, GrønlandsBANKEN-ip Inuussutissarsiornermut aningaasaateqarfiata NunaFondenillu aningaasatigut tapiissuteqarnissamik nutaanik isumaqatigiissuteqarfiginerisigut Ivalo & Minik Fondenip legatinik agguaassisarnini ingerlatiinnarsinnaavaa. Qinnuteqarfissaq tulleq 2018-imi februaarip 15-ianut killeqarpoq.